Қазақстандық атеросклероз қоғамының (ҚАҚ) Board мүшесі, Алматы көпсалалы клиникалық ауруханасының дәрігері Айжан Серікқызы Кемерова International Atherosclerosis Society (IAS) ұйымдастыратын IAS Inflammation Academy Flagship Experience 2026–2027 беделді халықаралық білім беру бағдарламасының қатысушысы атанды.
2026 жылы бағдарламаға әлемнің түкпір-түкпірінен 200-ге жуық өтінім келіп түсті. Қатаң іріктеу нәтижесінде тек 30 маман таңдалды. Олардың қатарында Қазақстан атынан Айжан Кемерова да бар.
Қазақстандық атеросклероз қоғамының қолдауымен доктор Кемероваға бағдарламаға қатысу үшін жол жүру және тұру шығындарын өтейтін 1 500 АҚШ долларына дейінгі халықаралық грант (Travel Scholarship) берілді.
Бағдарламаның алғашқы офлайн кездесуі 2026 жылғы 27 тамызда Германияның Мюнхен қаласында өтеді. Бір жыл ішінде жас мамандарды әлемнің жетекші сарапшыларынан білім алу, халықаралық вебинарлар, ғылыми жобалар және көшбасшылық құзыреттерді дамыту бағдарламалары күтіп тұр.
«Қазақстанды IAS Inflammation Academy Flagship Experience бағдарламасында таныстыру — мен үшін үлкен мәртебе. Сенім мен қолдау көрсеткен Қазақстандық атеросклероз қоғамына шын жүректен алғыс айтамын. Алған білімім мен халықаралық тәжірибем заманауи тәсілдерді клиникалық тәжірибеге енгізуге және еліміздегі кардиология мен профилактикалық медицинаның дамуына үлес қосуға көмектеседі деп сенемін», — деді Айжан Кемерова.
